آخر تحديث:
المياه الزرقاء أو «الجلوكوما» مش مجرد ارتفاع في ضغط العين؛ هي مجموعة من الأمراض اللي ممكن تسبب تلف في العصب البصري، ومع الوقت تأثر على مجال النظر لو ما اتشخّصتش واتعالجت بدري.
المشكلة إن أشهر أنواع المياه الزرقاء ممكن يبدأ ويتطور من غير ألم أو أعراض واضحة، والمريض ما يلاحظش ضعف النظر غير بعد ما المرض يكون أثر على جزء منه.
هل ضغط العين العالي معناه مياه زرقاء؟
مش كل شخص ضغط عينه مرتفع يكون عنده مياه زرقاء، وفي نفس الوقت ممكن تحصل جلوكوما عند بعض المرضى رغم إن قياس ضغط العين في المعدل الطبيعي.
علشان كده التشخيص ما يعتمدش على قياس الضغط لوحده، لكن لازم يتم تقييم حالة العصب البصري وباقي الفحوصات المناسبة لكل مريض.
مين يحتاج يهتم بالفحص؟
الاهتمام بالفحص والمتابعة بيكون مهم بشكل أكبر في حالة:
- وجود تاريخ عائلي للمياه الزرقاء.
- ارتفاع ضغط العين.
- التقدم في السن.
- مرض السكر أو ارتفاع ضغط الدم.
- استخدام أدوية الكورتيزون لفترات طويلة.
- وجود إصابة أو عملية سابقة في العين.
بنشخّص المياه الزرقاء إزاي؟
في عيادتنا بنقيس ضغط العين، ونفحص العصب البصري وقاع العين، ونحدد إذا كانت الحالة محتاجة فحوصات إضافية أو متابعة دورية.
الهدف مش بس نعرف رقم ضغط العين، لكن نقيّم حالة العصب البصري ونحدد نوع وسبب ارتفاع الضغط وخطة العلاج المناسبة.
هل المياه الزرقاء ليها علاج؟
العلاج هدفه تقليل ضغط العين والحفاظ على الجزء المتبقي من النظر ومنع أو إبطاء تطور المرض. وبيختلف حسب كل حالة، وممكن يشمل قطرات للعين، أو علاج بالليزر، أو تدخل جراحي.
الجزء اللي اتأثر من النظر بسبب المياه الزرقاء غالبًا ما بيرجعش، وده اللي بيخلي الاكتشاف المبكر والالتزام بالعلاج والمتابعة المنتظمة مهمين جدًا.
لو حصل ألم شديد ومفاجئ في العين مع احمرار وزغللة أو صداع وغثيان، لازم يتم فحص العين بصورة عاجلة.